قواعد الغربة الاربعين

قواعد الغربة الاربعون ...لكل المتغربين

1- حاول متتغربش

2- حاول متجيش السعودية

3- حاول متجيش السعودية

4- حاول متجيش السعودية

5-لو مفيش حل غير السفر يبقي بلد بتعاملك كبني ادم و ده غالبا معناه اوروبا او استراليا او كندا و لو مفيش فرصة يبقي دبي

6- لو مفيش غير الخليج يبقي تسأل كويس و كويس أوي كمان علي كل و أي حاجة ليها علاقة بالبلد اللي انت رايحها و اسأل عن كل تفصيلة في العقد , ابعت ناس معارفك و قرايبك يسألولك الشركة اللي انت رايحها دي نظامها ايه , اكتر غلطة بتتعمل في الغربة انك بتسافر و خلاص

7-حاول تسافر قبل ما تتجوز و ترجع أول ما تخلف

8- مفيش اصحاب في الغربة , اصحابك هما اللي عملتهم في بلدك , لو طلعت بصاحب واحد من الغربة تبقي كسبت معانا السعفة الذهبية

9- دائما و ابدا اتكلم مصري , مهما كان تعاملك مع غير مصريين متتكلمش زيهم ابدا

10- حاول متجيش السعودية

11- الانترنت عامة و السوشيال نيتوركس ( زي الفيس بوك و تويتر ) خاصة هي صديقك الصدوق و عدوك اللدود مع بعض

12- لا ينصح في الغربة بتشجيع الزمالك و الأرسنال و ريال مدريد ولا سماع (يا رايح ) بتاعة رشيد طه أو ( كل الحاجات ) بتاعة منير أو (الغربة ) بتاعة البلبيسي او (الغربة) بتاعة يحيي غنام

13-اشتكي علطول من الغربة , دايما اشتكي , حسس نفسك و عيش في موود ان ده وضع غلط و لازم يتظبط برجوعك لمصر

14- الكورة و الاستيمشن و البلاي ستيشن من اساسيات الحياة هنا , لازم تجيد علي الأقل حاجة واحدة من دول.

15- الاجازة هي أكسير الحياة , انبساطك في الاجازة و قهرتك و انت سايب مصر و راجع دليل علي انك لسه انسان سوي

16- لازم لازم لازم اي بلد تسافرها يكون فيها بحر , البلد اللي مفيهاش بحر بتحسسك انك مسجون جوه تابوت

17- المصريين فعلا وحشين مع بعض في الغربة بما فيهم انت , الغربة بتطلع أسوأ ما فيك حتي لو انت ملاك او حتي لو انت شخصية زبالة , مجرد انك ترجع مصر زي ما سبتها ده في حد ذاته انجاز

18-كل ما فيلم 4 2 4 ييجي اتفرج عليه

19- معظم الناس اللي في مصر هيبقي حبايبك أوي طول فترة الاجازة , فكرة ان انت بعيد و بتنزل اجازة زي السياح او الضيوف بتخللي الكل عايز يقابلك و يتبسط معاك و تبقي انت مرتبط في دماغهم بالسفر و الاجازة و دي حاجة حلوة جدا

20- النقاش مع الناس اللي بقالها كتير بره مصر ضار جدا بالصحة و يودي الي الوفاة

21- حاول متجيش السعودية

22-حاول متجيش اي بلد لسه فيها حاجة اسمها كفيل أصلا

23-الفلوس حلوة , حاول تشتغل بفلوس كتير بس متبقاش معفن , أوسخ ناس في الغربة و في الدنيا عموما اللي يقدر يعيش كويس و يبقي ماسك علي نفسه

24-يلعن أبو الأهلي و برشلونة

25-الجزيرة الرياضية هي أمك التي لم تلدك , أول مرتب تجيب بيه الجزيرة الرياضية و بعدين تفكر تاكل

26- اياك اياك اياك تدخل السجن في الغربة , لو اتظلمت و دخلت قشطه كله عند ربنا و يا بخت من بات مظلوم بس اوعي تعمل حاجة تخليك تبات في حبس بلد ملكش حد فيها

27-في ليفيل واحد للتدين تقريبا عند معظم المغتربين اللي هو الاساسيات البسيطة اوي بتاعة الدين , اللي جي من مصر صايع و مقضيها بيبدأ يصلي و بيدعي و بيفكر في ربنا علشان سنين الغربة تعدي عليه و اللي جاي قافش و متشدد من مصر بيرخي شوية - كتير - و بيعمل حاجات عادية عند الناس كانت مستحيل يعملها في مصر علشان سنين الغربة تعدي عليه

28-ربنا يكفيك شر الخضة اللي بتيجي من مكالمة جاية من مصر بليل متأخر مثلا او في ميعاد انت مش متعود تكلمهم فيه,بتبقي من أول مبتكنسلهم ( الدقيقة الدولي بره مصر غالبا أرخص من مصر ) و لحد ما تتصل و يردوا عليك مبتقولش غير ربنا يستر

29- أهم مميزات الغربة في السعودية هما مكه و المدينة , هو صحيح بعد فترة مبيكونش عندك احساس اول مرة بتزورهم بس برضه بيعملولك ريفريش كل مره بتروحهم

30- الشطارة في الشغل مهمة بس السلكان اهم 1000 مرة , انك تكون شاطر و سالك مع مديرك ( اللي غالبا أجنبي ) و مع صاحب الشغل ( اللي غالبا من اهل البلد ) اهم بكتير من انك تكون شاطر بس

31- في جنسيات حلو فشخ انك تتعامل معاها و جنسيات زبالة فشخ , بس عامة حوار انك تتعامل مع جنسيات تانية ده لذيذ

32-ابقي هات هدايا كتير للناس كل ما تنزل اجازة

33-متدفعش فلوس في الجيم علشان غالبا مش هتروح و الفلوس هتروح عليك

34- لو بلد فيها واحد صاحبك هتديك فلوس اقل شوية من بلد تانية ملكش حد فيها , روح وش البلد اللي فيها صاحبك

35- النوستالجيا في الغربة عاملة زي دور البرد كده , ممكن تخبطك في اي وقت و بتاخد وقتها و تروح

ا36-لناس في الغربة علطول بتسنج نفسها بأن الناس في مصر مش عارفة تعيش و الحياة مستحيلة في مصر ( نفس الكلام كان بيتقال من قبل الثورة بس طبعا بعد الثورة بقي 10 أضعاف ) علشان تقنع نفسها انها خدت القرار الصح و ان عمرها مبيتسرقش ولا حاجة بعيد عن أهلها و بلدها.

37-خليك فاكر مصر جميلة مصر جميلة : بصوت محمد طه وفي الخلفية شيخ و قسيس بيحضنوا بعض و ابو تريكه بيعمل الطيارة بعد ما جاب جون و القهوة اللي بتقعد عليها انت و اصحابك و صورة امك كبيرة فوق كل ده

38- حاول متتغربش

39- حاول متجيش السعودية

40- حاول متجيش السعودية